Jarðskjálftahrina – Síða 101 – Jarðfræði á Íslandi

október 13, 2013

Jarðskjálftahrina á Reykjanesskaga

Í dag (13-Október-2013) klukkkan 01:11 hófst jarðskjálftahrina á Reykjanesskaga. Þessi jarðskjálftahrina var mjög lítil í upphafi þangað til klukkan 07:34 þegar jarðskjálfti með stærðina 4,8 átti sér stað. Sá jarðskjálfti fannst mjög víða, samkvæmt fréttum allt frá Vík í Mýrdal til Hólmavíkur á Ströndum. Talsverð eftirskjálftavirkni hefur átt sér stað í kjölfarið á stærsta jarðskjálftanum. Undan stærsta jarðskjálftanum voru tveir jarðskjálftar með stærðina 3,4 og síðan 3,5 með upptök á svipuðum slóðum. Ekki hefur verið tilkynnt um neinar skemmdir samkvæmt fréttum í kjölfarið á þessum jarðskjálfta.

Jarðskjálftahrinan á Reykjanesskaga. Höfundarréttur þessar myndar tilheyrir Veðurstofu Íslands.

Stærstu jarðskjálftarnir sáust mjög vel á jarðskjálftamæla-netinu mínu og er hægt að skoða jarðskjálftana hérna á jarðskjálftamæla-vefsíðunni sem ég er með.

Jarðskjálftinn sem mældist með stærðina 4,8. Þessi jarðskjálftamælastöð er á Eyrarbakka og útslagið var mest þar eins og sést, þar sem útslagið er meira en hæsta útslag jarðskjálftamælisins. Þessi mynd er undir Creative Commons Leyfi. Nánari upplýsingar er að finna á CC leyfi síðunni.

Stærsti jarðskjálftinn á Reykjanesskaga á jarðskjálftamælum í Heklubyggð. Þessi mynd er undir Creative Commons Leyfi. Nánari upplýsingar er að finna á CC leyfi síðunni.

Stærsti jarðskjálftinn á jarðskjálftamælinum í Böðvarshólum. Þessi mynd er undir Creative Commons Leyfi. Nánari upplýsingar er að finna á CC leyfi síðunni.

Stærsti jarðskjálftinn á jarðskjálftamælinum í Skeiðflöt. Þessi mynd er undir Creative Commons Leyfi. Nánari upplýsingar er að finna á CC leyfi síðunni.

Það er ekki hægt að segja til um það hvernig þessi jarðskjálftahrina mun þróast á næstu klukkutímum. Undanfarna klukkutíma hefur dregið úr jarðskjálftavirkni en það er engu að síður hætta á því að jarðskjálftavirknin taki sig upp aftur og aukist á ný. Þetta svæði á Reykjanesskaganum er þekkt fyrir slíka tegund af virkni, það er þó ekki víst að slíkt muni gerast en það er hætta á því. Eins og stendur er ekkert sem bendir til þess að þarna sé kvika á ferðinni og engin hætta á eldgosi eins og stendur. Sú staða gæti breyst en mér þykir það ólíklegt eins og staðan er núna.

október 11, 2013

Jarðskjálftahrina í Eyjafjallajökli

Í dag (10-Október-2013) varð minniháttar jarðskjálftahrina í Eyjafjallajökli. Þetta var mjög lítil jarðskjálftahrina og enginn jarðskjálftinn náði stærðinni 2,0. Stærsti jarðskjálftinn var með stærðina 1,0 og á dýpinu 4,3 km. Það hafa ekki komið fram nein merki þess að eldgos sé að fara hefjast í Eyjafjallajökli, og það hafa heldur ekki komið fram nein merki þess að ný kvika sé farin að streyma inn í Eyjafjallajökul. Hugsanlegt er að þetta sé gömul kvika sem er á ferðinni hérna, það er þó erfitt að vera viss um það eins og er. Ef þetta er gömul kvika og ef þetta nær upp á yfirborðið þá verða í mesta lagi sprengingar. Það er hinsvegar ekkert víst að slíkt muni gerast og ekkert bendir til þess eins og er að slíkt sé að fara gerast.

Jarðskjálftahrinan í Eyjafjallajökli. Höfundarréttur þessar myndar tilheyrir Veðurstofu Íslands.

Ástæða þess að svona litlir jarðskjálftar mælast núna í Eyjafjallajökli er sú að SIL mælanetið er orðið mun þéttara í kringum Eyjafjallajökli en var fyrir eldgosið árið 2010. Það þýðir að mun minni jarðskjálftar eru að mælast núna en árið 2010. Á þessari stundu eru þetta ekkert nema jarðskjálftar og ég reikna ekki með neinum frekari atburðum í kjölfarið á þessari jarðskjálftahrinu. Það gæti þó breyst með skömmum fyrirvara ef frekari breytingar verða á Eyjafjallajökli á næstunni.

Eldgosið árið 2010.
Eldgosið árið 1821 – 1823.

október 4, 2013

Dregur úr jarðskjálftahrinunni á Tjörnesbrotabeltinu

Í dag (03-Október-2013) hefur heldur dregið úr jarðskjálftahrinunni á Tjörnesbrotabeltinu. Jarðskjálftahrinan hefur haldið áfram eins og undanfarna viku, stærsti jarðskjálftinn í dag var með stærðina 3,5 og dýpi þessar jarðskjálftahrinu hefur verið í kringum 5 til 15 km. Jarðskjálfti með stærðina 3,1 átti sér einnig stað í dag. Þessari jarðskjálftar fundust á Siglufirði, Ólafsfirði og Dalvík.

Stærstu jarðskjálftanir í þessari jarðskjálftahrinu. Hægt er að sjá myndina í upprunalegu samhengi hérna á vef Veðurstofu Íslands. Höfundaréttur þessar myndar tilheyrir Veðurstofu Íslands.

Þó svo að dregið hafi úr jarðskjálftahrinunni þá er jarðskjálftahrinan ennþá í gangi. Það getur verið að aðeins hafi dregið tímabundið úr jarðskjálftahrinunni eða þá að þessi jarðskjálftahrina er að fjara út eins og er. Það er ekki ljóst hvað er raunin hérna en það mun koma í ljós með tímanum hvað gerist næst á Tjörnesbrotabeltinu.

Jarðskjálftahrinan í dag á Tjörnesbrotabeltinu. Höfundaréttur þessar myndar tilheyrir Veðurstofu Íslands.

Það eru ekki nein merki þess að kvika hafi náð til yfirborðs í kjölfarið á þessari jarðskjálftahrinu. Það er einnig ennþá óljóst hvort að kvikuinnskot hafi verið valdur að þessari jarðskjálftahrinu á Tjörnesbrotabeltinu.

október 3, 2013október 3, 2013

Jarðskjálftahrinan á Tjörnesbrotabeltinu heldur áfram

Jarðskjálftahrinan á Tjörnesbrotabeltinu heldur áfram í dag (02-Október-2013) frá því í gær (01-Október-2013). Helsta breytingin frá því í gær er aukning jarðskjálfta og þeir hafa einnig orðið stærri. Í dag er stærsti jarðskjálftinn með stærðina 3,8 (sjálfvirk niðurstaða) og ekki er hægt að útiloka að stærri jarðskjálftar muni eiga sér stað þarna. Dýpi jarðskjálftahrinunnar er 5 til 15 km og virðist ekki vera breytast eins og stendur. Það er ennþá ósannað hvort að það sé kvikuinnskot sem er að valda þessari jarðskjálftahrinu eða bara hefðbundnar flekahreyfingar, slíkt mun líklega ekki verða sannað fyrr en að þarna hefst eldgos og það er ekki víst að slíkt muni gerast.

Jarðskjálftahrinan á Tjörnesbrotabeltinu í dag. Höfundaréttur þessar myndar tilheyrir Veðurstofu Íslands.

Fjöldi jarðskjálfta í dag (02-Október-2013) er svipuð og í gær (01-Október-2013) og virðist sem að engar sérstakar breytingar hafi átt sér stað í fjölda jarðskjálfta milli daga. Stærstu jarðskjálftanir hafa fundist á Ólafsfirði, Siglufirði og alveg til Dalvíkur í dag ásamt öðrum svæðum sem eru nærri upptökum þessar jarðskjálftahrinu. Það eru engin merki þess eins og stendur þess efnis að draga sér úr þessari jarðskjálftahrinu eins og er og óvíst hvenar það fer að draga úr þessari jarðskjálftahrinu. Hægt er að sjá stærstu jarðskjálftana í þessari jarðskjálftahrinu hérna á jarðskjálftamælavefsíðunni sem ég er með. Jarðskjálftanir koma best fram á jarðskjálftamælastöðinni sem heitir Böðvarshólar.

Facebook síðu þessa bloggs er hægt að finna hérna.

október 1, 2013október 2, 2013

Kröftugri jarðskjálftahrina á Tjörnesbrotabeltinu

Jarðskjálftahrinan á Tjörnesbrotabeltinu heldur áfram í dag (01-Október-2013). Stærsti jarðskjálftinn sem hefur mælst hingað til var með stærðina 3,2. Dýpi þessar jarðskjálftahrinu er í kringum 5 til 15 km. Stærstu jarðskjálftarnir fundist á Ólafsfirði og öðrum svæðum sem eru nærri upptökum þessar jarðskjálftahrinu. Eins og stendur þá er jarðskjálftahrinan ennþá í gangi og ekki sjást nein merki þess að þessi jarðskjálftahrinu sé að fara ljúka.

Jarðskjálftahrinan á Tjörnesbrotabeltinu. Höfundaréttur þessar myndar tilheyrir Veðurstofu Íslands.

Það hefur komið fram í fréttum Rúv og öðrum fréttamiðlum samkvæmt jarðfræðingi á Veðurstofu Íslands að þessi jarðskjálftahrina stafi hugsanlega af því að þarna sé um að ræða kvikuinnskot inn í jarðskorpuna á miklu dýpi. Það er engin eldstöð skráð á þessu svæði, ef það er eldstöð á þessu svæði. Þá er hún með öllu óþekkt eins og er. Slíkt getur gerst ef eldstöðvar eru í dvala mjög lengi og þar að auki neðansjávar. Hvað kemur útúr þessu verður hinsvegar að koma í ljós á næstu klukkutímum til dögum. Það er ekki víst að kvikan nái upp á yfirborðið og valdi eldgosi, þar sem að dýpið er ennþá mjög mikið og því á kvikan eftir að fara umtalsverða fjarlægð áður en hún nær til yfirborðs og veldur eldgosi.

Hægt er að fylgjast með jarðskjálftavirkninni á Tjörnesbrotabeltinu hérna á jarðskjálftamælavefsíðunni minni. Sá jarðskjálftamælir sem ég er með næst þessari jarðskjálftahrinu er jarðskjálftamælir sem heitir „Böðvarshólar“ og þar sjást nú þegar nokkrir af þeim jarðskjálftum sem hafa átt sér stað síðasta sólarhringinn á Tjörnesbrotabeltinu. Þessi jarðskjálftamælir er staðsettur úti í sveit og því er lítið um truflanir frá umferð og slíku á honum.

Ég mun setja inn uppfærslur varðandi þessa jarðskjálftahrinu ef þörf verður á slíku.

Bloggfærsla uppfærð þann 01-Október-2013 klukkan 23:54. Leiðrétting á bæjarnafni eftir ábendingu um að það væri rangt bæjarnafn sem ég hafði skrifað inn.

september 30, 2013

Jarðskjálftahrinan á Tjörnesbrotabeltinu ennþá í gangi

Jarðskjálftahrinan sem hófst á Tjörnesbrotabeltinu fyrir viku síðan er ennþá í gangi. Í dag (30-September-2013) hafa rétt um 1000 jarðskjálftar mælst á Tjörnesbrotabeltinu og ekkert bendir til þess að jarðskjálftahrinunni sé að ljúka.

Jarðskjálftahrinan á Tjörnesbrotabeltinu. Höfundaréttur af þessari mynd tilheyrir Veðurstofu Íslands.

Þessi jarðskjálftahrina hefur ekki fundist í byggð, enda hafa flestir jarðskjálftar verið undir 2,0 að stærð. Einhverjir jarðskjálftar hafa þó náð stærðinni 2,8. Enginn jarðskjálfti hefur hingað til náð stærðinni 3,0. Það er nauðsynlegt að fylgjast með þróunni þar sem svona jarðskjálftahrinur eru óútreiknanleg-ar með öllu og vonlaust að vita hvað gerist næst.

september 27, 2013

Áframhaldandi jarðskjálftahrina á Tjörnesbrotabeltinu

Jarðskjálftahrinan sem hófst á Tjörnesbrotabeltinu fyrir tveim dögum síðan heldur áfram (fyrri færsla um jarðskjálftahrinuna er að finna hérna). Það virðist sem að jarðskjálftahrinan hafi verið að vaxa á síðustu klukkutímum talið í fjölda jarðskjálfta. Stærstu jarðskjálftanir hingað til hafa verið með stærðina 2,6 til 2,7 samkvæmt sjálfvirkum niðurstöðum hjá Veðurstofu Íslands.

Jarðskjálftahrinan á Tjörnesbrotabeltinu. Höfundaréttur þessar myndar tilheyrir Veðurstofu Íslands.

Eins og er þá hefur ekki neinn af þessum jarðskjálftum fundist í byggð. Það er vegna þess að þessir jarðskjálftar eru ennþá frekar litlir og tiltölulega langt frá byggð (~20 km). Eins og stendur er þessi jarðskjálftahrina að mestu samfelld, þó með smá hléum sem vara ekki lengur en í 1 til 3 klukkutíma. Þessi jarðskjálftahrina stendur ennþá yfir og ég reikna með að verði þannig næstu klukkutímana hið minnsta.

september 25, 2013

Jarðskjálftahrina á Tjörnesbrotabeltinu

Í dag (25-September-2013) hófst jarðskjálftahrina á Tjörnesbrotabeltinu. Þessi jarðskjálftahrina hófst með litlum jarðskjálftum en hefur verið að sækja smá í sig veðrið eftir því sem liðið hefur á daginn. Stærsti jarðskjálftinn sem hefur komið hingað til var með stærðina 2,8 samkvæmt sjálfvirkum niðurstöðum Veðurstofu Íslands.

Jarðskjálftahrinan á Tjörnesbrotabeltinu. Höfundaréttur þessar myndar tilheyrir Veðurstofu Íslands.

Ég reikna með að þessi jarðskjálftahrina haldi eitthvað áfram. Þar sem jarðskjálftahrinur eins og þessar eru mjög algengar á Tjörnesbrotabeltinu. Þannig að þessi jarðskjálftahrina kemur ekki á óvart í dag. Ef stórir jarðskjálftar eiga sér stað er hægt að sjá þá á jarðskjálftamælavefsíðunni minni hérna.

september 9, 2013

Minniháttar jarðskjálftahrina í Öræfajökli

Í dag (09-September-2013) varð minniháttar jarðskjálftahrina í Öræfajökli. Þetta var minniháttar jarðskjálftahrina og var mjög grunn og var á dýpinu 2,6 til 4,8 km. Stærsti jarðskjálftinn var með stærðina 2,0.

Jarðskjálftahrina í Öræfajökli. Höfundaréttur þessar myndar tilheyrir Veðurstofu Íslands.

Jarðskjálftavirkni er ekki mikil í Öræfajökli og það gerir þessa jarðskjálftavirkni mjög áhugaverða. Þessa stundina er þetta bara jarðskjálftavirkni og ég reikna ekki með því að neitt annað gerist í kjölfarið á þessari jarðskjálftavirkni. Hugsanlegt er að fleiri jarðskjálftar muni eiga sér stað í Öræfajökli næstu dögum og vikum. Þó er alveg jafn líklegt að ekkert meira muni gerast í kjölfarið á þessari jarðskjálftavirkni.

september 8, 2013

Áhugaverð jarðskjálftavirkni í Hamrinum

Undanfarna daga hefur verið áhugaverð jarðskjálftavirkni í Hamrinum, sem er eldstöð í Vatnajökli. Jarðskjálftarnir eiga sér stað á tveim sprungum sem virðast hafa stefnuna austur-vestur. Líklega er um að ræða sprungu í eldstöðinni með þessa stefnu, það hefur þó ekki verið ennþá staðfest. Ég veit ekki afhverju þetta er að gerast, en í dag (07-September-2013) mældi ég jarðskjálfta frá Hamrinum og þessi jarðskjálfti sýnist mér hafa merki þess að um væri að ræða jarðskjálfta sem á uppruna sinn í kvikuhreyfingum inni í eldstöðinni Hamrinum. Það hefur þó ekki ennþá verið staðfest og ekki er víst að það verði nokkurntímann staðfest. Stærsti jarðskjálftinn hingað til var með stærðina 2,2 og var á dýpinu 4,5 km.

Jarðskjálftavirkni í Hamrinum. Höfundaréttur þessar myndar tilheyrir Veðurstofu Íslands.

Síðasta eldgos sem átti sér stað í Hamrinum átti sér stað þann 11 til 12-Júlí-2011. Það eldgos var minniháttar og fjallaði ég um það hérna (á ensku) og hérna (á ensku). Jarðskjálftavirknin í dag er á sama svæði og það gaus árið 2011. Undanfarin að því eldgosi var talsverð jarðskjálftavirkni í Hamrinum mánuðina og hugsanlega árin þar á undan. Ég veit ekki hvort að núverandi jarðskjálftavirkni mun enda í eldgosi eða ekki, þar sem ekki er hægt að spá fyrir um slík að svo stöddu. Hinsvegar er ekki hægt að útiloka slíkt eins og stendur. Það besta sem er hægt að gera er að fylgjast með stöðu mála í Hamrinum og sjá hvort að einhverjar frekari breytingar muni eiga sér stað í Hamrinum.

Samþykki fyrir vefköku