Category: Reykjanes

Birt þann

Lítil jarðskjálftahrina á Reykjaneshrygg

Í gær (04-Apríl 2020) varð lítil jarðskjálftahrina á Reykjaneshrygg nærri Eldey. Stærsti jarðskjálftinn í þessari hrinu var með stærðina Mw3,3 en aðrir jarðskjálftar sem komu fram voru minni að stærð. Þessi jarðskjálftahrina er í eldstöðinni Reykjanes.


Jarðskjálftavirknin á Reykjaneshrygg. Höfundarréttur þessar myndar tilheyrir Veðurstofu Íslands.

Þessi jarðskjálftavirkni virðist vera tengd þeim atburðum sem eru núna að eiga sér stað í eldstöðinni norðan við Grindavík og í eldstöðinni Reykjanes og núna er þetta bæði á Reykjanesskaga og Reykjaneshrygg. Það verður jarðskjálftavirkni þarna til lengri tíma og ég mun ekki skrifa um alla þá virkni sem þarna mun eiga sér stað.

Birt þann

Yfir 6000 jarðskjálftar mælst á Reykjanesskaga frá upphafi Janúar 2020

Nýjustu fréttir frá Veðurstofunni eru að það hafa mælst yfir 6000 jarðskjálftar á Reykjanesskaga síðan í upphafi Janúar 2020 í eldstöðinni Reykjanes. Þetta er mesti fjöldi jarðskjálfta sem hefur mælst þarna síðan jarðskjálftamælingar hófust á þessu svæði árið 1991. Þá hafa einnig mælst þrjú kvikuinnskot á þessu svæði samkvæmt tilkynningu frá Veðurstofu Íslands og það er mín skoðun að fjórða (og fimmta?) kvikuinnskotið er við Eldey úti á Reykjaneshrygg þó að ekki sé hægt að sanna neitt í slíku vegna skorts á GPS mælingum og því eru kvikuinnskot þar ekki eins greinanleg og á landi.


Jarðskjálftavirknin norðan við Grindavík. Höfundaréttur þessar myndar tilheyrir Veðurstofu Íslands.

Síðustu daga hafa komið fram jarðskjálftar með stærðina Mw3,0 og Mw3,1. Þessi jarðskjálftavirkni mun halda áfram á þessu svæði. Þensla á þessu svæði hefur náð 60mm til 70mm en þenslan er að eiga sér stað yfir stórt svæði og það er farið að opna gamlar sprungur og færa til gömlum misgengi sem þarna eru. Afleiðinganar verða jarðskjálftar vegna þeirra breytinga sem þenslan veldur á misgengjum á þessu svæði.

Fréttatilkynningar Veðurstofu Íslands

Rannsaka þarf núverandi virkni á Reykjanesskaganum heildstætt
Vísbendingar um nýtt kvikuinnskot á Reykjanesi

Styrkir

Þeir sem vilja styrkja mína vinnu hérna geta gert það með því að nota PayPal takkann á síðunni. Styrkir hjálpa mér að vinna við þetta og reka þessa vefsíðu. Takk fyrir stuðninginn. 🙂

Birt þann

Tveir sterkir jarðskjálftar í eldstöðinni Reykjanes

Í dag (25-Mars 2020) urðu tveir sterkir jarðskjálftar í eldstöðinni Reykjanes. Stærstu jarðskjálftarnir voru með stærðina Mw3,1 og stærðina Mw3,9. Aðrir jarðskjálftar sem komu fram voru minni að stærð. Það virðist sem að þessari jarðskjálftahrinu sé lokið en það er áframhaldandi virkni á þessu svæði en virknin þarna kemur fram í hrinum og það eru engin merki um að farið sé að draga úr virkni á þessu svæði.


Jarðskjálftavirknin á Reykjanesskaga í eldstöðinni Reykjanes við Grindavík. Höfundarréttur þessar myndar tilheyrir Veðurstofu Íslands.

Þensla heldur áfram á svæðinu í kringum Grindavík þó svo að umrædd þensla sé minni en sú þensla sem var í gangi í upphafi Janúar. Það útskýrir jarðskjálftavirknina á svæðinu undanfarið. Jarðskjálftavirkni kemur fram í hrinum og er rólegt á milli jarðskjálftahrina. Það virðist vera að verða styttra á milli hrina og jarðskjálftar eru að verða stærri, það er ekki alveg ljóst afhverju það er.

Birt þann

Jarðskjálftahrina í eldstöðinni Krýsuvík

Í gær (20-Mars 2020) varð jarðskjálftahrina í eldstöðinni Krýsuvík. Stærsti jarðskjálftinn í hrinunni var með stærðina Mw3,0. Jarðskjálftahrinunni er lokið þegar þessi grein er skrifuð. Það er óljóst hvort að þessi jarðskjálftahrina var vegna spennu í jarðskorpunni eða vegna kvikuhreyfinga.


Jarðskjálftahrinan í Krýsuvík eldstöðinni. Höfundarréttur þessar myndar tilheyrir Veðurstofu Íslands.

Það hafa komið fram jarðskjálftahrinur á þessu svæði síðustu vikur eftir að þenslan og jarðskjálftavirknin hófst í eldstöðinni Reykjanes (Þorbjörn) en það er ekki vitað hvort að þessi virkni í Krýsuvík tengist virkninni í eldstöðinni Reykjanes.

Birt þann

Aukning í jarðskjálftum við Þorbjörn (Reykjanes eldstöðin)

Þann 19-Mars 2020 varð jarðskjálftahrina norðan við Grindavík (Þorbjörn) í eldstöðinni Reykjanes. Í þessari jarðskjálftahrinu urðu nokkur hundruð jarðskjálftar og stærstu jarðskjálftarnir voru með stærðina Mw3,0, Mw3,2 og Mw3,3 og þarna varð talsvert af jarðskjálftum á mjög grunnu dýpi og það er ekki almennilega þekkt afhverju það er að eiga sér stað núna. Þessari jarðskjálftahrinu virðist vera lokið núna en jarðskjálftavirknin sem þarna verður kemur í hrinum og það er mismunandi milli hrina hversu stórar og langar þær eru.


Jarðskjálftavirknin í eldstöðinni Reykjanes. Höfundarréttur þessar myndar tilheyrir Veðurstofu Íslands.

Þensla heldur áfram á þessu svæði og það veldur jarðskjálftavirkni á þessu svæði. Það sem virðist vera að gerast núna er að meiri virkni á sér stað yfir stærra svæði. Þegar þessi grein er skrifuð eru ekki nein merki þess að kvika sé farin að leita upp á yfirborðið.

Jarðskjálftamælar

Ég er búinn að koma jarðskjálftamælunum mínum aftur í gang eftir talsverðar bilanir undanfarið. Ég þurfti að færa hugbúnaðinn (stýrikerfið) frá Windows yfir í Debian Linux þar sem Windows 10 einfaldlega virkar ekki nógu vel fyrir þann hugbúnað sem ég er að nota. Stefnan er að færa aðal tölvuna yfir á Debian Linux en ég veit ekki hvenær sá flutningur getur orðið vegna gagna sem þarf að flytja á milli (ásamt öðrum vandamálum sem ég þarf að leysa áður en þetta er mögulegt). Hægt er að fylgjast með jarðskjálftamælunum hérna.

Birt þann

Jarðskjálfti með stærðina Mw4,2 í eldstöðinni Reykjanes

Í dag (18-Mars 2020) klukkan 10:42 varð jarðskjálfti með stærðina Mw4,2 í eldstöðinni Reykjanes. Þessi jarðskjálfti varð upphafið af jarðskjálftahrinu á þessu svæði og er jarðskjálftahrinan ennþá í gangi þegar þessi grein er skrifuð.


Jarðskjálftahrinan á Reykjanesskaga í eldstöðinni Reykjanes. Höfundarréttur þessar myndar tilheyrir Veðurstofu Íslands.

Jarðskjálftavirkni er aftur farin að aukast á þessu svæði á Reykjanesskaga en þensla á þessu svæði er byrjuð aftur en minni en áður. Það gæti breyst eftir því sem tíminn líður. Ég náði ekki að mæla þennan jarðskjálfta þar sem jarðskjálftamælanetið mitt er bilað en ég hef verið að reyna að gera við það síðustu daga en Microsoft hefur slökkt á þeim möguleika að nota Windows XP og Windows Vista. Ég er að vinna að lausn á þessu vandamáli en það tekur bara smá tíma að koma þeirri lausn í gagnið.

Styrkir

Þeir sem vilja geta styrkt mína vinnu með því að nota PayPal takkann hérna á síðunni. Ég er mjög blankur núna í seinni hlutann í Mars. Takk fyrir stuðninginn. 🙂

Birt þann

Jarðskjálfti með stærðina Mw5,2 við Þorbjörn (Fagradalsfjall)

Í dag (12. Mars 2020) klukkan 10:25 varð jarðskjálfti með stærðina Mw5,2 við Fagradalsfjall austan við Grindavík (eldstöðin Reykjanes). Þessi jarðskjálfti fannst á stóru svæði. Það virðist sem að þessi jarðskjálfti sé í beinum tengslum við þenslu sem á sér stað þarna.


Jarðskjálftinn með stærðina Mw5,2 við Fagradalsfjall. Hægt er að nota myndina ef heimilda er getið.


Jarðskjálftinn með stærðina Mw5,2 við Fagradalsfjall. Hægt er að nota myndina ef heimilda er getið.


Jarðskjálftavirknin við Fagradalsfjall í kjölfarið á Mw5,2 jarðskjálftanum. Höfundarréttur þessar myndar tilheyrir Veðurstofu Íslands.


Jarðskjálftavirknin við Fagradalsfjall í kjölfarið á Mw5,2 jarðskjálftanum. Höfundarréttur þessar myndar tilheyrir Veðurstofu Íslands.

Það er ennþá hætta á stórum jarðskjálftum á þessu svæði og það mun líða talsverður tími þangað til að virknin fer að róast á þessu svæði. Þegar þessi grein er skrifuð eru engin merki um það að kvika sé farin að brjóta sér leið upp á yfirborð. Það er óljóst hvort að það muni breytast en þegar þessi grein er skrifuð hafa engin slík merki sést.

Birt þann

Hættulegar gastegundir mælast við eldstöðina Reykjarnes

Í dag í fréttum var tilkynnt að hættulegar gastegundir hefðu mælst í hellum við eldstöðina Reykjanes á Reykjanesskaga. Þessi breyting bendir til þess að kvika sé komin mjög grunnt í jarðskorpuna og mögulega á 1 km dýpi eða minna. Slæma veðrið undanfarna klukkutíma hefur komið í veg fyrir að litlir jarðskjálftar hafi mælst á þessu svæði almennilega. Það hefur ekki verið nein breyting á jarðskjálftavirkni á þessu svæði og þensla er í kringum 60mm og hefur verið þar undanfarna daga.

Fréttir af þessu

Lífshættuleg breyting milli vikna en enginn gosórói (Rúv.is)

Birt þann

Aukin jarðskjálftavirkni í eldstöðinni Reykjanes

Í dag (17. Febrúar 2020) jókst jarðskjálftavirknin í eldstöðinni Reykjanes sem er staðsett vestan við Þorbjörn sem er við Grindavík. Megnið af þessari jarðskjálftavirkni er mjög litlir jarðskjálftar og stærstu jarðskjálftarnir hafa verið með stærðina Mw2,8. Fleiri en 160 jarðskjálftar hafa átt sér stað í dag. Jarðskjálftavirknin er ennþá í gangi á þessu svæði og þessi tala mun því breytast hratt.


Jarðskjálftavirknin við eldstöðina Reykjanes. Höfundaréttur þessar myndar tilheyrir Veðurstofu Íslands.

Þensla heldur áfram á þessu svæði og sérstaklega við Þorbjörn þar sem þenslan er orðin meiri en 60mm en ég hef ekki góða hugmynd um það hversu mikil þensla er á þessu svæði núna.

Myndir af virka svæðinu á Reykjanesi

Hérna eru nokkrar myndir sem ég tók af virka svæðinu á Reykjanesi í dag (17. Febrúar 2020). Ég náði því miður ekkert mjög mörgum myndum þar sem það var kalt og hvasst á þessu svæði í dag. Allar myndir eru eftir mig.


Reykjanesið og Atlantshafið. Höfundarréttur Jón Frímann Jónsson


Kletturinn við ströndina. Höfundarréttur Jón Frímann Jónsson


Eldey í fjarska. Höfundarréttur Jón Frímann Jónsson


Gunnuhver á Reykjanesi. Höfundarréttur Jón Frímann Jónsson

Hægt er að sjá fleiri myndir og myndband á Instagram hjá mér hérna.

Birt þann

Staðan á jarðskjálftavirkni við Grindavík þann 2. Febrúar 2020

Styrkir
Vinsamlegast munið að styrkja mína vinnu ef þið getið. Þar sem styrkir hjálpa mér að reka þessa vefsíðu þannig að ég get skrifað um jarðskjálfta og eldgos sem verða á Íslandi. Ég hef fjarlægt auglýsingar þar sem þær skiluðu litlum tekjum og það er verið að fylgjast mjög mikið með fólki í gegnum auglýsingar. Það þýðir að ég þarf að treysta meira á styrki til þess að halda þessari vefsíðu gangandi og geta skrifað um þá jarðskjálftavirkni og eldgos sem verða á Íslandi. Þetta er nauðsynlegt þegar mikið er að gerast á Íslandi eins og er staðan í dag. Takk fyrir stuðninginn. 🙂

Jarðskjálftavirkni við Grindavík þann 2. Febrúar 2020

Jarðskjálftavirknin við Grindavík heldur áfram eins og hefur verið undanfarið. Stærstu jarðskjálftarnir síðasta sólarhringinn voru með stærðina Mw3,3 og Mw3,0. Mikið er um minni jarðskjálfta og sjást þeir ekki alltaf strax á sjálfvirka jarðskjálftakorti Veðurstofu Íslands. Yfir 200 jarðskjálftar hafa átt stað síðan á miðnætti. Yfir 1200 jarðskjálftar hafa átt sér stað síðan 21. Janúar 2020 þegar þessi jarðskjálftavirkni hófst. Þenslan er mjög svipuð og hefur verið og er farin að nálgast 50mm en sveiflast aðeins milli daga (GPS gögn er að finna hérna) og er óljóst afhverju það er. Mest af þenslunni virðist vera í nágrenni við Bláa lónið. Flestir jarðskjálftar eiga sér stað suð-austur af þar sem mesta þenslan á sér stað á sprungu sem suður-vestur og norður-austur. Það er mjög rökrétt staðsetning miðað við þensluna en það vantar alveg jarðskjálftavirkni norðan-vestan við hæsta punkt þar sem þenslan á sér stað.


Jarðskjálftavirknin við Grindavík í dag. Höfundaréttur þessar myndar tilheyrir Veðurstofu Íslands.


Jarðskjálftavirknin á svæðinu síðan 21. Janúar 2020 til 2. Febrúar 2020. Myndin er fengin héðan. Höfundaréttur þessar myndar tilheyrir Veðurstofu Íslands.


Svæðið þar sem jarðskjálftar eru núna að eiga sér stað. Höfundarréttur þessar myndar tilheyrir Google.


Jarðskjálftavirknin á svæðinu síðustu 48 klukkutíma. Höfundaréttur þessar myndar tilheyrir Veðurstofu Íslands.

Það eru engin merki þess ennþá að kvikan sem er að troða sér inn í jarðskorpuna á 3 til 6 km dýpi sé farin að brjóta sér leið upp á yfirborðið. Það er mögulegt að ekki sé nægur þrýstingur ennþá til þess að það gerist. Hvað gerist næst er ekki hægt að segja til um. Jarðskjálftar munu halda áfram þangað til að þenslan stoppar eða þangað til að eldgos hefst.