Category: GPS mælingar

Birt þann

Staðan í Bárðarbungu þann 1-Október-2014

Þessar upplýsingar geta breyst mjög hratt ef eitthvað gerist í Bárðarbungu.

Staðan í Bárðarbungu klukkan 22:50

  • Eldgosið í Holuhrauni er núna búið að vara í mánuð og það eru ekki nein merki þess að eldgosinu fari að ljúka fljótlega.
  • Hraunið í Holuhrauni er núna orðið 47,8 ferkílómetrar að stærð og fer stækkandi með hverjum deginum.
  • Gígurinn sem gýs úr stækkar með hverjum deginum og virðist  vera orðinn mjög sýnilegur í landslaginu sem þarna er til staðar.
  • Það virðist gjósa úr 400 til 600 metra sprungu í Holuhrauni. Þetta er mitt mat byggt á þeim myndböndum sem ég hef séð á internetinu af eldgosinu undanfarið.
  • Jarðskjálftavirkni heldur áfram í kvikuinnskotinu og er núna farin að aukast undir jöklinum, og það er áhyggjuefni, þar sem líkunar á eldgosi undir jökli hafa aukist til muna við þessa jarðskjálftavirkni.
  • Stærsti jarðskjálftinn í dag átti sér stað klukkan 17:59 og var með stærðina 4,8. Annar stærsti jarðskjálftinn í dag varð klukkan 02:44 og var með stærðina 4,2.
  • Slæmt veður í Holuhrauni hefur komið í veg fyrir mælingar vísindamanna á svæðinu samkvæmt fréttum.
  • Mengun vegna SO2 (brennisteinsdíoxíði)  er mjög mikil eftir vindátt og fór hæst í dag í rúmlega 5800 míkrógrömm í rúmmetra miðað við 10 mínúta gildi.
  • Askja Bárðarbungu heldur áfram að síga á svipuðum hraða og áður.
  • Slæmt veður fram á Laugardag mun koma í veg fyrir að hægt sé að fylgjast almennilega með eldgosinu. Sérstaklega þegar fer að snjóa á Föstudaginn samkvæmt veðurspánni í dag.
  • Engar frekari fréttir af stöðu mála eftir því sem ég kemst næst.
Birt þann

Staðan í Bárðarbungu þann 30-September-2014

Þessar upplýsingar munu verða úreltar mjög hratt ef eitthvað gerist í Bárðarbungu.

Staðan í Bárðarbungu klukkan 23:08 UTC

  • Það eru ekki nein merki þess ennþá að eldgosinu í Holuhrauni sé að ljúka. Eins og stendur eru aðeins einn eða tveir gígar að gjósa í Holuhrauni.
  • Hraunið er núna 47 ferkílómetrar að flatarmáli samkvæmt nýjustu mælingu. Það breiðir úr sér núna þar sem það hefur ekki orku til þess að lengjast eins og stendur.
  • Jarðskjálftavirkni á sér ennþá undir kvikuinnskotinu. Það bendir til þess að eldgosið sem á sér stað núna sé ekki nægjanlega stórt til þess að gjósa allri þessari kviku sem er þarna undir. Því er þrýstingur að aukast í kvikuinnskotinu núna.
  • Stærsti jarðskjálftinn í dag var með stærðina 4,8 og átti hann sér stað klukkan 19:24. Annar stærsti jarðskjálftinn í dag varð klukkan 14:53 og var með stærðina 4,7. Aðrir jarðskjálftar í dag hafa verið minni.
  • Eldgosið í Holuhrauni er núna orðið tvisvar sinnum stærra en Kröflueldar sem gusu árið 1974 – 1984 samkvæmt vísindamönnnum. Hægt er að lesa um það hérna í frétt frá því í dag (30-September-2014).
  • Askja Bárðarbungu hefur núna sigið um rúmlega 30 metra samkvæmt síðustu mælingu. Þetta er samkvæmt Magnúsi Tuma Guðmundssyni hjá Háskóla Íslands. Það er reiknað með að fljúga yfir Bárðarbungu í lok vikunnar þegar flugvélin sem þeir nota kemur úr viðhaldi.
  • Veðurstofu Íslands hefur staðfest að það er bara hraun að flæða í Jökulsá á Fjöllum núna. Ný gossprunga hefur ekki opnast upp eins og halda mætti á vefmyndavélum Mílu.
  • Sú gliðnunarhrina sem þarna er hafin jafngildir núna því að uppsöfnuð gliðnun á þessu svæði í Bárðarbungu síðustu 150 ára. Svona gliðnun á sér stað öll á sama tíma og það er ljóst að gliðnunarhrinunni er ekki lokið.
  • Slæmt veður hefur komið í veg fyrir að vísindamenn geti verið á svæðinu í kringum Holuhraun. Reikna má með að veðrið fari ekki að lagast fyrr en 2-Október-2014. Þar sem reiknað er með nýjum óveðri á morgun.

Einn mánuður frá því að eldgos í Holuhrauni hófst

Í dag (30-September-2014) er einn mánuður rúmlega síðan fyrsta eldgosið í Holuhrauni átti sér stað. Á morgun (1-Október-2014) er einn mánuður síðan núverandi eldgos í Holuhrauni hófst.

Áhrif vinds á jarðskjálftamælingar

Á þessari mynd má sjá hvernig vindur hefur áhrif á jarðskjálftamælinn hjá mér og aðrar jarðskjálftamæla á Íslandi. Þetta er ekki hávaði vegna vinds. Þetta er hávaði vegna öldugangs við strendur Íslands og síðan langt út á sjó þar sem óveður eru núna.

140930.210500.bhre.psn

Svona á að lesa þessa mynd. Fyrst er jarðskjálftinn, þarna er fyrst P bylgjan og síðan kemur S bylgjan. Ásamt örðum bylgjum sem er að finna í jarðskjálfta. Bylgjunar sem eru yfir alla myndina er öldugangur sem skellur á ströndum Íslands og síðan djúpt útá norður Atlantshafi og á Grænlandshafi norður af Íslandi. Toppurinn sem verður á milli 21:07:21 – 21:07:41 er truflun vegna rafmagns, truflunin sem verður á milli 21:08:41 – 21:09:21 er vegna dýra eða á upptök sín í öðru sem veldur truflunum á jarðskjálftamælinum. Þessi mynd er undir Creative Commons leyfi, sjá CC Leyfi fyrir frekari upplýsingar.

Birt þann

Staðan í Bárðarbungu þann 29-September-2014

Hérna er staðan í Bárðarbungu þann 29-September-2014.

Yfirlit yfir stöðuna í Bárðarbungu þann 29-September-2014

  • Stærsti jarðskjálftinn í dag hafði stærðina 5,5 og var á 5,6 km dýpi. Annar stærsti jarðskjálftinn í dag var með stærðina 4,9 og var á 3,1 km dýpi. Aðrir jarðskjálftar voru minni og stærsti jarðskjálftinn í dag fannst á Akureyri og nágrenni.
  • Vegna storms var ekki hægt að gera mælingar eða fylgjast með eldgosinu samkvæmt fréttum. Þar sem jarðvísindamenn komust ekki á svæðið vegna veðurs.
  • Eldgosið í Holuhrauni er búið að vara í næstum því mánuð núna.
  • Þann 29-Ágúst-2014 varð fyrsta eldgosið í Holuhrauni. Það varði aðeins í nokkrar klukkustundir og gaus á sama stað og hafði gosið áður árið 1797 í gamalli gígaröð sem þar er.
  • Vegna slæms veðurs mældust aðeins þeir jarðskjálftar sem náðu upp fyrir vindhávaðann í dag. Þetta var einnig staðan á jarðskjálftamælunum mínum í dag.
  • Hraunið í Holuhrauni er núna stærra en 44 ferkílómetrar að stærð, hversu mikið hraunið hefur stækkað í dag er ekki vitað almennilega vegna slæms veðurs.
  • Bárðarbunga heldur áfram að síga með svipuðum hætti og hefur verið síðan þetta ferli hófst þann 16-Ágúst-2014.
  • Engar frekari upplýsingar um stöðu eldgossins eftir því sem ég kemst næst.

Ég mun setja inn nýjar upplýsingar ef eitthvað gerist í Bárðarbungu.

Birt þann

Staðan í Bárðarbungu þann 26-September-2014

Þetta er staðan í Bárðarbungu þann 26-September-2014. Þessar upplýsingar geta orðið úreltar án fyrirvara.

Staðan í Bárðarbungu klukkan 21:54

  • Stærsti jarðskjálftinn í dag varð klukkan 16:49 og hafði stærðina 5,2. Annar stærsti jarðskjálfti dagsins varð klukkan 18:43 og hafði stærðina 4,3.
  • Þegar stærsti jarðskjálftinn varð í dag lækkaði askjan um rúmlega 30sm. Askjan í Bárðarbungu heldur áfram að lækka samkvæmt GPS mælingum og er sigið 50sm/á dag. Samtals hefur askjan lækkað um 29 metra.
  • Minni jarðskjálftar eru að eiga sér stað í Bárðarbungu. Það þýðir að askjan í Bárðarbungu lækkar þegar þessir jarðskjálftar eiga sér stað.
  • Kvikuinnflæði í Bárðarbungu er mjög svipað og síðustu daga. Þetta sést vel á GPS mælingum Háskóla Íslands og það er hægt að skoða þær mælingar hérna.
  • Mikill sandstormur var við Holuhraun í dag og skyggni var lítið samkvæmt frétt Rúv. Ekki nema rétt um 50 til 100 metrar á tímabili.
  • Eldgosið í Holuhrauni er með mjög svipuðum hætti og síðustu daga. Hraunið er núna stærra en 40 ferkílómetrar samkvæmt síðustu fréttum, ég hef ekki nákvæmari stærð í dag vegna veðurs.
  • Jarðskjálftavirkni heldur áfram í kvikuinnskotinu og bendir það til þess að þrýstingur sé að aukast innan þess.
  • Ekkert meira hefur gerst í Bárðarbungu í dag, en það gæti breyst án viðvörunar.
  • Samkvæmt veðurspánni þá verður slæmt veður á Íslandi um helgina. Því má reikna með miklum vindhávaða á jarðskjálftamælum Veðurstofunnar og á mínum jarðskjálftamælum.

Næsta uppfærsla

Þar sem núna er Föstudagur þá mun ég setja næstu uppfærslu hingað inn á laugardeginum 27-September-2014. Ég óska öllum góðrar helgar.

Birt þann

Staðan í Bárðarbungu þann 25-September-2014

Þetta er staðan í Bárðarbungu klukkan 21:54. Það er hætta á því að þessar upplýsingar verði úreltar án viðvörunar.

  • Eldgosið í Holuhrauni heldur áfram og það er ekkert sem bendir til þess að sé að fara enda. Stærð Holuhrauns er núna í kringum 40 ferkílómetrar að stærð. Ég hef ekki heyrt nákvæma stærð hraunsins í dag.
  • Lækkun öskju Bárðarbungu heldur áfram og er ennþá í kringum 50sm/á dag. Það er ekkert sem bendir til þess að farið sé að draga úr þessu sigi öskjunnar.
  • Stærsti jarðskjálftinn í dag varð klukkan 05:00. Annar stærsti jarðskjálftinn í dag varð klukkan 16:35 og var með stærðina 5,0. Aðrir jarðskjálftar í dag hafa verið minni.
  • Jarðskjálftavirkni heldur áfram að aukast í kvikuinnskotinu. Það bendir til þess að þrýstingurinn sé að aukast og það eykur hættuna á nýju eldgosi utan og innan jökuls.
  • Reiknað er með slæmu veðri næstu daga. Það þýðir að erfitt verður að fylgjast með eldgosinu og því sem er að gerast í Bárðarbungu.
  • Ég hef ekki neinar frekari fréttir af stöðunni í Bárðarbungu í dag.

Jarðskjálftavirkni í kvikuinnskotinu

Jarðskjálftavirkni í kvikuinnskotinu heldur áfram og það bendir til þess að þrýstingur sé að aukast innan kvikuinnskotsins. Það þýðir að hættan á nýju eldgosi er að aukast og það bendir einnig til þess að núverandi eldgos sé ekki nógu stórt fyrir það magn kviku sem er að flæða inn í Bárðarbungu af miklu dýpi. Þetta þýðir einnig að kvikuþrýstingur er að aukast innan kvikuhólfs Bárðarbungu og það eykur hættuna á eldgosi í öskju Bárðarbungu. Slíkt eldgos mundi hefjast án viðvörunar.

140925_2120
Jarðskjálftavirknin í kvikuinnskotinu eykst suður með kvikuinnskotinu eftir því sem þrýstingur eykst í því. Færist stöðugt nær sjálfri Bárðarbungu. Það er einnig talsverð jarðskjálftavirkni undir sjálfu eldgosinu í Holuhrauni. Höfundaréttur þessar myndar tilheyrir Veðurstofu Íslands.

Birt þann

Staðan í Bárðarbungu þann 24-September-2014

Þessar upplýsingar munu verða úreltar mjög hratt.

Staðan í Bárðarbungu klukkan 22:42

  • Eldgosið í Holuhrauni er með svipuðum hætti og í gær. Eins og stendur þá gýs hinsvegar aðeins einn eða tveir gígar þessa stundina. Það getur breyst án viðvörunar.
  • Hraunið er núna í kringum 40 ferkílómetrar að stærð. Þetta er annað stærsta hraun á Íslandi í dag, stærsta hraun sem runnið hefur síðan á 19 öld kom frá Heklu árið 1947 í 13 mánaða eldgosi. Það hraun er í kringum 80 ferkílómetrar að stærð. Það er reiknað með að Holuhraun muni ná þeirri stærð eftir eina og hálfa viku eða tvær vikur (eftir því hvernig krafturinn er í eldgosinu).
  • Stærsti jarðskjálftinn frá miðnætti var með stærðina 5,2. Aðrir jarðskjálftar hafa verið minni í dag.
  • Hraunið er núna að fara renna yfir Gæsavatnaleið samkvæmt fréttum. Þetta þýðir að vegur sem jarðfræðingar hafa verið að nota lokast. Við síðustu athugun þá átti hraunið eftir 200 metra þangað til að það færi yfir veginn.
  • Jarðskjálftavirkni er að aukast í kvikuinnskotinu. Það bendir til þess að þrýstingur sé að aukast innan þess núna. Hættan á nýju eldgosi þar sem kvikuinnskotið er hefur því aukist margfalt frá því sem var áður og mikil hætta er á því að eldgos muni eiga sér undir jökli með tilheyrandi vandamálum (jökulflóði, öskugosi og slíkum hlutum).
  • Ef að eldgos mun eiga sér stað undir jökli. Þá mun óróinn aukast til mikilla muna frá því sem núna er. Jökulflóð mundi einnig sjást í kjölfarið fljótlega eftir að eldgos hæfist. Það reyndar veltur á því hvaða leið vatnið færi undir jökli.
  • Engar aðrar stórar breytingar hafa átt sér stað í Bárðarbungu í dag.

Ef eitthvað breytist þá mun ég setja inn nýjar upplýsingar hingað inn.

Birt þann

Staðan í Bárðarbungu þann 23-September-2014

Þessar upplýsingar munu verða úreltar mjög hratt.

Staðan í Bárðarbungu klukkan 23:41

  • Stærsti jarðskjálftinn í dag var með stærðina 5,1 og varð klukkan 04:33. Annar stærsti jarðskjálftinn í dag varð klukkan 13:44 og var með stærðina 4,5.
  • Askja Bárðarbungu heldur áfram að lækka um 50 sm á dag.
  • Órói bendir til þess að meiri kvika sé að flæða inn í Bárðarbungu en að gjósa í Holuhrauni. Það er að valda því að þrýstingur er að aukast innan Bárðarbungu núna.
  • GPS mælingar eru hættar að haga sér undarlega. Ég veit ekki afhverju það er og hvað það þýðir.
  • Órói sem kom fram klukkan 22:40 bendir til þess að lítið eldgos hafi átt sér stað. Þetta eldgos varði ekki lengi og er líklega búið núna.
  • Jarðskjálftavirkni er að færast suður með kvikuinnskotinu og bendir það til þess að þrýstingur sé að aukast innan þess. Það þýðir að aukin hætta er á eldgosum undir jökli.

Ef frekari breytingar verða þá mun ég setja inn upplýsingar um það hingað. Ef mjög stórir atburðir verða. Þá mun ég skrifa nýja grein um það sem er að gerast.

Birt þann

Staðan í Bárðarbungu laugardaginn 20-September-2014

Þessar upplýsingar munu verða úreltar mjög fljótt.

Staðan í Bárðarbungu klukkan 12:31

  • Stærsti jarðskjálftinn síðan á miðnætti hafði stærðina 5,1. Aðrir jarðskjálftar hafa verið minni.
  • Eldgosið í Holuhrauni heldur áfram með svipuðum hætti og fyrr. Helst gýs í miðgígnum sem er núna orðinn mjög hár og rís talsvert hátt yfir sléttuna sem þarna er til staðar.
  • Askja Bárðarbungu heldur áfram að síga eins og áður, er sighraðinn núna í kringum 50sm/á dag.
  • Jarðskjálftavirkni er ennþá í kvikuinnskotinu og nær sú jarðskjálftavirkni talsvert undir Dyngjujökul.
  • Ég er að sjá talsvert af óróapúlsum á jarðskjálftamælum í kringum Bárðarbungu. Ég tel víst að það sé ekki gott. Ég hef rakið þá virkni til suður og suð-vestur Bárðarbungu miðað við útslag á jarðskjálftamælum Veðurstofunnar.
  • GPS gögnin (vefur Háskóla Íslands er að finna hérna á ensku) eru ennþá að segja mjög mismunandi hluti eins og stendur gengur mér mjög illa að skilja hvað er að gerast. [Vegna leyfismála þá tengi ég eingöngu í þá vefsíðu. Myndin breytist með tímanum og því gildir þessi texti aðeins þegar skrifa hann.]
  • Efnasamsetning kvikunnar hefur verið að breytast eftir því sem liðið hefur á eldgosið. Samkvæmt nýjustu fréttum þá virðist sem að kvikan sem er núna að koma upp komi frá meira en 10 km dýpi.  Það þýðir að á meira en 10 km dýpi sé líklega mjög stórt kvikuhólf sem er fært um að viðhalda eldgosum í Bárðarbungu í mjög langan tíma.
  • Jarðfræðingar reikna með að vera við Holuhraun fram að jólum samkvæmt fréttum.
  • Rekhrinan hefur ekki ennþá hafist sunnan við Bárðarbungu. Hvenær það mun gerast veit ég ekki, en það er ljóst að syðri hluti Bárðarbungu kerfisins mun fara af stað á næstu dögum til mánuðum þar sem rekhrina er nú þegar hafin í norðari hluta kerfisins.

Ef eitthvað meiriháttar gerist. Þá mun ég setja inn nýjar upplýsingar hingað eða skrifa nýja grein.

Birt þann

Staðan í Bárðarbungu þann 16-September

Þetta er staðan í Bárðarbungu. Þessar upplýsingar geta orðið úreltar mjög fljótt.

Talsverð jarðskjálftavirkni er ennþá í Bárðarbungu. Stærsti jarðskjálftinn í dag hafði stærðina 5,2, en fleiri jarðskjálftar hafa orðið síðan þá en hingað til hafa þeir verið minni í stærð eða stærð þeirra hefur ekki fengist staðfest. Eins og staðan er núna þá dregur úr virkninni í Holuhrauni samkvæmt því sem hefur komið fram í fréttum um gang mála. Slíkt er eðlilegt í þeim rekatburðum sem núna eiga sér stað í Bárðarbungu, reikna má með nýjum eldgosum þar sem kvikuinnskotið er til staðar eða í sjálfri Bárðarbungu.

Óróinn er mjög svipaður í dag og síðustu daga, en ég er engu að síður að sjá vísbendingar um það að þrýstingur sé aftur farinn að aukast í kvikukerfi Bárðarbungu. Það eitt og sér eykur líkunar á nýjum eldgosum eins og ég nefni að ofan. Að öðru leiti er staðan óbreytt eftir því sem kemst næst.

Ég mun setja inn nýjar upplýsingar um stöðu mála eftir því sem þarf.

Birt þann

Staðan í Bárðarbungu þann 15-September-2014

Þessar upplýsingar munu verða úreltar mjög fljótt.

Staðan í Bárðarbungu klukkan 15:07

  • Jarðskjálfti með stærðina 5,4 varð klukkan 08:04.
  • Öskjusig varð í kjölfarið á þessum jarðskjálfta og varði það í rúmlega 2 til 3 klukkutíma eftir skjálftann samkvæmt frétt Rúv. Þetta öskjusig varð í heildina um 45 sm samkvæmt GPS mælingu.
  • Eldgosið í Holuhrauni er svipað og í gær. Það gýs ennþá í miðjugígnum samkvæmt fréttum og minni gígum í nágrenni við aðal-gýginn. Hrunaflæði er ekki nægt til þess að komast yfir Jökulsá á Fjöllum eins og stendur. Þannig að núna breiðir hraunið úr sér frá aðal-gígnum.
  • Jarðskjálftavirkni hefur verið að færast suður með kvikuinnskotinu. Það eykur hættuna á því að eldgos hefjist undir jökli án mikils fyrirvara. Það hafa nú þegar orðið minniháttar jarðskjálftar undir jöklinum.
  • Mengun vegna SO2 (Brennisteinsoxíð) er mikið vandamál þar sem hana rekur undan vindi. Fólk þarf að fylgjast með veðurspám til þess að átta sig á því hvort að það sé í hættu að yfir sig Brennisteinsoxíð mengun.

Staðan í Bárðarbungu klukkan 20:53

  • Hugsanlegt er að nýr gígur eða ný sprunga hafi opnast sunnan við núverandi gossprungu. Ég sé það þó ekki almennilega á vefmyndavél Mílu eins og er.
  • Sú rekhrina sem er hafinn í Bárðarbungu mun vara í marga mánuði samkvæmt fréttum á Rúv.
  • Ef eldgosið í Holuhrauni klárast þá mun hefjast eldgos á öðrum hlutum kvikuinnskotsins. Það gæti alveg eins gerst á svæði þar sem enginn jökull er til staðar, eða undir jökli. Það er engin leið til þess að vita það fyrir víst.

Grein uppfærð klukkan 15:17.
Grein uppfærð klukkan 20:56.