Í dag (8-Desember-2021) hefur verið jarðskjálftahrina norður af Grindavík. Stærsti jarðskjálftinn hingað til var með stærðina Mw3,1 klukkan 10:44. Það kemur ekki fram í fréttum hvort að þessi jarðskjálfti fannst í Grindavík. Jarðskjálftavirkni þarna hefur hægt og rólega verið að aukast síðan það hætti að gjósa í Fagradalsfjalli þann 18-September-2021. Það er ennþá jarðskjálftahrina á svæðinu og eru þar litlir jarðskjálftar að koma fram þegar þessi grein er skrifuð.
Þessi jarðskjálftavirkni á sér stað í eldstöðinni Reykjanes. Eldstöðin sem gaus í Fagradalsfjalli var mjög líklega eldstöðin Krýsuvík-Trölladyngja eða hugsanlega er um að ræða óskilgreinda eldstöð á þessu svæði. Hvað það er nákvæmlega er óljóst núna í dag. Eldstöðin Reykjanes gaus hugsanlega síðast árið 1831 en það er allt saman mjög óljóst út frá þeim gögnum sem til eru.
Það er hætta á stærri jarðskjálftum á þessu svæði. Það er ekki hægt að segja til um það hvenær slíkir jarðskjálftar yrðu.